Eldum íslenskt með kokkalandsliðinu

Matreiðslubókin „Eldum íslenskt með kokkalandsliðinu“ fylgir í fótspor bókarinnar „Einfalt með Kokkalandsliðinu“ sem kom út í fyrra og seldist upp.

Í bókinni er fjöldi uppskrifta en höfuðáherslan er lögð á íslenskt hráefni, uppruna þess, eldamennsku og fróðleik tengdan mat og matargerð. Íslenskar búvörur eru í forgrunni en í bókinni er fjöldi kjöt-, grænmetis- og fiskrétta auk sósuuppskrifta, brauðuppskrifta og eftirrétta. Bókin er sérstök fyrir þær sakir að hver réttur inniheldur aðeins fimm hráefni, auk þess sem til er í hverju eldhúsi, sem gerir innkaupin auðveld og fljótleg.
 
Ásamt því að Kokkalandsliðið í gegnum tíðina býr til bókina koma bændur að útgáfunni og sýna hvernig hráefnið verður til í íslenskum sveitum. Bókin er tæpar 200 blaðsíður að lengd en aðalritstjóri hennar er Bjarni Gunnar Kristinsson, yfirmatreiðslumeistari í Hörpunni, en uppskriftirnar koma frá meðlimum Kokkalandsliðsins fyrr og nú.