Meistari Hinna blindu

„Sundrungin rústaði Gamla heiminum. Logar féllu af himnum ofan á glæstar borgir á meðan forynjur gengu um götur þeirra. Lönd færðust úr stað, hinir dauðu risu af dvala og öll ill öfl veraldar komu úr felum. Mannkynið var rekið á flótta og gert að stefnulausri hjörð sem Dauðaherrarnir veiddu að vild.“

Í sundraðri veröld þar sem mannkynið er umsetið ókennilegum öflum vaknar Mikael í mannlausu þorpi, minnislaus, særður og eini eftirlifandi fólskulegrar árásar. Mikael heldur af stað í leit að ódæðismönnunum og svörum um eigin fortíð. Í ferðalagi um grimman en heillandi heim uppgötvar hann ýmislegt um sjálfan sig og kynnist bæði bandamönnum og óvinum.

Skrímsli leynast jafnt í eyðilendum Jaðarsins sem skúmaskotum stórborga. Áður en Mikael veit af er hann orðinn hluti af baráttu þar sem ævafornar verur úr myrkraheimum herja á sálir manna og það sem eftir stendur af brothættri siðmenningu.

Hvaða hlutverk er Mikael ætlað í hinum miklu hörmungum sem í hönd fara í Jaðrinum?

Hverjar eru fyrirætlanir leynifélagsins sem virðist vita allt um hin dularfullu átök?

Og hvað merkir óútskýranlega táknið á líkama Mikaels?

Elí Freysson stígur fram á ritvöllinn með fyrsta verkið í fantasíubókaröð sem mun heilla lesendur og opna fyrir þeim nýja heima.

„Einstök rödd, einstök saga, einstök skemmtun.“ Illugi Jökulsson